1 Zimmer, 14 m²

Hello :)
Miar sind d Sophia und dr Sebi, Gschwüsterti us Graubünda, gründend a neui 3-WG im Gundeli und suachend no a dritta/i Mitbewohner:in. Miar wünschend üs a entspannti, fründschaftlichi WG, wo en unkompliziarta Umgang und a gmüatlichi Atmosphäre mit viel Ustusch herrscht. Üsi WG söll kei reini Zweck WG si. Gmüatlichi Öbig mit gmeinsamemem kocha und ässa sind bi üs sehr willkomma und miar sind au motiviart zum züüg usserhalb vo dr WG zäma zunterneh. Gegesitigi Rücksichtnahm und Platz für persönlicha Ruum sind üs aber natürlich gnauso wichtig :)
Zum Zimmer/zur Wohnig
• Ds Zimmer isch 14.7m2 gross, hell und unmöbliert
• D Miati isch 620 CHF inkl. NK
• Dr Iizug isch nach Absprach im Juli/August/September möglich (gern Wunschtermin mitteila)
• D Wohnig isch im Gundeli in dr Nöchi vom Tellplatz und z Fuass öppa 10 min vom SBB Bahnhof entfernt, mit em Velo isch ma au schnell an dr Uni
• D Wohnig isch im 2. Stock (Huus mit Lift) und hät 3 Zimmer, en grossa Entrée wo gmeinsam als Esszimmer/Wohnzimmer gnutzt wird, 2 Balkön, 1 gmeinsames Bad/WC (Badewanne), Waschmaschine (teilt mit anderna Mieter im Huus) und en Fahrradabstellplatz
*Wiel miar selber erst am 1. Juli iizüchend hämmer nu Bilder vo dr Wohnig us em April. Also nid nu dr Ämtliplan und Routina chönnd vo Grund uf mitgstaltet werda – au d Wohnig wird no nid fertig iigrichtet sie (ds wichtigsta werdend miar aber organisiara und Anfangs Juli uf Basel zügla)
Zu üs:
I bin d Sophia (19) und fang im September es Politikwüssaschafts- und Soziologiestudium ah. Näb dr Uni lohn ii mi zur Yogalehrerin usbilda, tob mi gern kreativ us und han freud am (vegi) kocha. Am liabsta sitz ii dr ganz Tag aswo in dr Sunna und gnüssa ds Läba :) I bin ufgstellt und oft mitteiligsbedürftig – drum wär ii bi interessa grad z ha für gmeinsami Kochöbig und spontani Deeptalks uf em Balkon.
I bin dr Sebi (21) und verbring z nögsta Jahr als Zeitmilitär bi dr Militärmusig in Aarau. I bin selber zwar viel unterwägs, fänds aber trotzdem toll, mal zäma Znacht essa oder sich mit da Mitbewohnis über da Alltag usztuuscha. In miner Freiziit gohni gern an Konzert und macha selber au Musik (Rockband und Chor). Aber kei Angst – in dr WG werdi nid üaba ;) Wenni sus nid grad mitem Velo oder uf dr Skipista unterwegs bin, probieri au gern neui Sacha us.
üseri Wunschvorstellig vom 3. Mitbewohni ;)
• Du bisch interessiert anera fründschaftlicha WG mitera gmüatlicha Atmosphäre und offa zum mitanand kocha/ässa, gmüatlich uf em Balkon hänga und bitz pläuderla
• Du bisch zuaverlässig, stubarein und kommunikativ - und wennd bitz humor und good vibes mitbringsch wär das top ;)
• Du bisch zwüscha 18-30 und Nichtraucher (mindestens dahai in dr Wohnig)
• Ob Student oder bruafstätig isch egal
Wenn du interessa häsch, chasch üs gern schrieba (Alter/was du machsch/was diar innera WG wichtig isch/Wunschtermin für dr Iizug etc)
Miar freuend üs uf Infos über di ?